லிப்ஸ்டிக்

உன்

உதடு தொட்ட காரணத்தால்

வெட்க்கிச் சிவந்ததோ...!

லிப்ஸ்டிக்

கடவுள்

கண்திறந்து பார்க்கும் சாமி
என நம்பி
கண்மூடித் தவமிருக்கும் மூடனே
கண் திறந்து பார்..
கடவுளே நீதான்
என்றுணர்வாய்.

உலகம் அழியட்டும்

மதத்தின் பெயரால்
இனத்தின் பெயரால்
நிறத்தின் பெயரால்
மொழியின் பெயரால்
ஆளாளுக்கு
அடித்துக்கொண்டு சாவதை விட
2012- இல்
உலகம் அழிந்து போகட்டும்.
மதம் இனம் நிறம் மொழியற்ற
புதியதோர் உலகு பிறக்கட்டும்
அங்கு
ராஜபக்க்ஷே ஹிட்லர் போன்றோரும்
அநியாயத்தைக் கண்டு பொங்காமல்
எழுதிக் கிழிக்கும்
படித்து ரசிக்கும்
நம் போன்ற
கேடுகெட்ட மனிதரெல்லாம்
கருவிலேயே கலைந்து போகட்டும்.

கிறுக்கித் தந்த பொழுது

வெற்றுக் காகிதம் கூட

விலை மதிப்பற்றதானது

நீ

கிறுக்கித் தந்த பொழுது

காற்றுணர்ந்த காதல்

உன்

முகம் படர்ந்த கூந்தலை

கோதிவிட

கைகள் குறுகுறுத்த கணம்

காற்று வந்து

உன் குழல் கலைத்துப் போனது

ஆம்

காற்றும் உணர்ந்த காதல் எனது

கண்டெடுக்கப்பட்டது

தொல்பொருள் ஆய்வாளன்

என் தொண்டைக் குழியை

குடைந்த போது

கண்டெடுக்கப்பட்டது

என் பதின் வயதில்

நான் சொல்லப் பயந்து

சொல்லாமல் அடைகாத்த

சில சொற்களும்

என் முதல் காதலும்

இன்னும் சிறிது காலம்தான்

என்னை

கம்பளிப்பூச்சி எனப் பார்த்து

இகழ்ந்தன சில வாய்கள்

சுருங்கின சில புருவங்கள்

நான் கூடு புகுந்து விட்டேன்

இன்னும் சிறுது காலம் தான்

வாய்கள் பிளக்கவும்

புருவங்கள் உயர்த்தவும்

இல்லை

நிலவில்
பாட்டி வடை சுட்ட கதை
எல்லா குழந்தைகளுக்கும் சொல்லப்படுகிறது
ஆனால் இதுவரை
யாருக்காக சுடுகிறாள் என்று
எந்த தாயும் சொன்னதுமில்லை
எந்த சேயும் கேட்டதுமில்லை